讲起“香山”，我角着（觉得）北京葛“香山”最有名气，俚不单单有燕京八景之一葛“西山晴雪”，也是中国四大赏枫胜地之一；山里葛碧云寺，孙中山先生曾暂厝四年；山腰葛双清别墅，毛泽东主席进京“赶考”前也小住过……
讲起“香山”，我还晓得太湖边浪也有个“香山”。葛地方出匠人，北京紫禁城，天安门就是“香山帮”匠人修筑葛……
讲起“香山”，小辰光我真葛不晓沙洲（现在叫张家港）也有座香山，号称“江南香山”
图片
今朝总算有机会亲眼目睹俚葛真容哉！从苏州开车一路从苏虞张公路、张家港东三环、张杨公路开嗞毛毛较（差不多）八、九十公里路，来到山脚下。
葛顶“香山”，据传说是春秋辰光吴王夫差派遣美人到山浪来采香，所以叫“香山”。俚勒浪现在张家港保税区金港镇，搭长江边浪葛长山、巫山相对，南傍东横河，搭稷山相望。山体呈菱形状，由大、小香山组成。北坡险峻，南坡平缓，顶部开阔，素有江南名山之誉。清朝康熙《江阴县志》里有“香山突出平壤，高峻磅礴，甲于他山”葛赞语。
图片
张家港葛“香山”，自然风光秀丽，人文资源丰富，加上扑朔迷离葛传奇故事，历来吸引嗞不少文人墨客观光赏游:宋代大词人苏东坡游香山葛辰光曾经为梅花堂题匾额；明朝徐霞客更加因为就住勒附近，蛮多次登上香山，留下磁不少诗词、赋文。俚勒嗨《游小香山梅花堂序》当中赞叹道：“千年迹冷荒丘，一旦香生群玉，不特花香、境香、梦亦香，可谓不负此山矣！”
老底子香山有“十八景”：钓鱼台、采香径、梅花堂、洗砚池、石虎门、圣过潭、观音殿、荷花茶厅、圆寂塔、听松吟、桃花涧、圣清池、毗陵井、巫山夜雨、天台石、归云洞、烽火墩、藏军洞。现在经过岁月流逝，沧桑巨变，传说当中葛大部分景点已荡然无存，我走马观花葛游览嗞一番:
图片
该个是钓鱼亭。相传姜子牙助周灭紂之后，遵嗞王命东游，寻觅泰伯、仲雍葛后代。途经香山葛辰光曾经勒浪北面山脚下头江边浪垂钓过。《江阴县志》、《风土记》侪有记载:“江阴东二十里，香山北麓有石广一丈三尺，是姜太公钓鱼之所在”。后世登人特为修筑该只亭子，以作纪念。
图片
上头是明香湖。为啥要叫“明香”呢？俚寓意“明风丽日奈何天，香兰凝露蛺蝶翩”，四季景色各异，繁茂葱茏、层林尽染侪勒浪该搭（这儿）尽情上演。
沿山路慢慢较向上，山虽然不算高，但不过也蛮有野趣。
图片
图片
山顶浪有一座近年造葛塔，叫“聆风塔”。塔身飞檐翘角，金色塔刹，八面九级，是明清楼阁式江南宝塔，一眼望过去，有琼楼玉宇之感。据介绍:登塔可聆听八面来风，江南秀色尽收眼底。但不过塔门紧闭，呒不办法去证实……
图片
相传勒浪春秋吴楚越争霸葛辰光，吴国为嗞防略楚国顺江而下偷袭自家，勒嗨香山顶浪修筑嗞廿七个藏军洞，侪是东西走向，洞口朝东。坑道呈喇叭形，外宽内窄。洞顶浪有气窗。A字形结构，两边用石块垒砌而成，顶部用大石头覆盖。
图片
该只洞是系原貌古洞，属于省级文物保护单位。
总体来讲，张家港葛“香山”虽然不好搭北京“香山”来比较，但不过俚风光旖旎，古迹众多，粗犷而不失秀丽，雄伟而不乏典雅，拨勒誉为“江南名山”也并不过分。
原创：钓雪
语四禅公众号 24.10.30
本站仅提供存储服务，所有内容均由用户发布，如发现有害或侵权内容，请点击举报。顺阳网-配资平台炒股票-手机配资股票一览表-配资门户公司官网提示：文章来自网络，不代表本站观点。
